有營簡單 "一個蕃茄飯" (附食譜)

最近因為疫症關係，多咗喺屋企食飯。收工返到屋企其實都已經夜晚八點幾。唔想太夜食，又其實已經冇乜力煮😖，就諗起幾年前好興的電飯煲蕃茄飯出嚟。簡簡單單的半個鐘頭已經有得食架喇~ 😊😊😊

蕃茄飯做法

材料：

1. 其實主要的材料好簡單，一定係有蕃茄😆😆。

2. 當然要有米😆😆。

3. 可以隨個人喜好再加菇類、蔬菜、肉類，而主人就最鍾意加海味。

4. 有D人會加雞蛋。

5. 好果喜歡食蔥的朋友，可以在最後灑上蔥花~

材料預備：

1. 蕃茄一個，洗淨，除去蕃茄蒂，喺蒂位輕輕界十字。

2. 菇類 - 如果做素食版，加入菇類可以提鮮好多。我會建議用浸發返的乾菇，無論係乾冬菇或者係台灣的快食菇乾等，都可以。

🌟 如果係快食菇乾就唔使浸好耐，一般十五分鐘左右都可以。但如果係乾冬菇，我就建議大家一早出門口之前就浸定先會好啲。

3. 蔬菜 - 蔬菜方面，我地都係唔好揀啲不耐煮的菜啦。不耐煮的係啲煮得耐會黃或許老的菜，多數的綠葉菜都不適合架。建議亦最啱我地唔係日日煮飯人屋企長期應該要有的係黃芽白或者娃娃菜，煮耐咗唔會苦又唔會老。

🌟蔬菜可以返到屋企洗咗先，吸走水份備用。

🌟如果用 Omnipork，可以用半包就夠了，新豬肉唔使好早解凍，夜晚收工返嚟先整都得。

4. 肉類 - 如果唔想只食蔬菜的朋友，可以加入肉類。如果茹素的朋友可以用新豬肉 Omnipork，或直接到下一項。

🌟肉類方面，我地屋企長期會有的急涷排骨。我地買慣咗 HKTV Mall 一包約 300 克，廿幾蚊一包的，點都會有一包喺屋企看門口。也可以用其他肉類，視乎自己口味。

🌟記得一早返工之前，要喺冰箱將掛骨放室溫或雪櫃下格解凍先。至於放室溫定雪櫃下格解凍就要視乎天氣喇。如果夏天就緊係唔好咁早開始室溫啦😛，咪肉類好肉易變壞架，放雪櫃下格就可以了。😊

🌟如果用 Omnipork，可以用半包就夠了，新豬肉唔使好早解凍，夜晚收工返嚟先整都得。

5. 海味 - 主人係大餸的子民，所以我地的蕃茄飯會加入乾瑤柱、蝦乾 等海味。

🌟 海味都係一返到屋企就要開始浸。浸約十五分鐘就夠。記得唔好倒咗啲浸海味的水呀。

做法：

A. 如果做素食版：

a. 收工返到屋企，乜都唔好做住，一，新豬肉喺冰箱取出，加入少少鹽和胡椒粉調味。二，浸(即食)菇，三，洗菜，四，洗蕃茄，除去蕃茄蒂，喺蒂位輕輕界十字，五，洗米。

b. 將洗好的米放入電飯煲，將蕃茄頭下腳上的放在飯面，電飯煲的中間，加入蔬菜及/或菇類。

c. 加入比平時煮飯少1/3 至 1/2 的水，包括浸菇的水呀，水的份量視乎蔬菜會出多少水。

即是，平時水和米的比例應該係 1 : 1

但現時係 水:米 比例 = 1/2 至 2/3 : 1

如果啲菜係多的，就少啲水

但唔好少過 1/2:1 的比例

咪D飯分分鐘唔熟架

d. 按下電飯煲的正常煮飯按鈕。然後就可以休息梳洗等食。

e. 飯煲好後，灑上蔥花，將蕃茄攪爛就可以。🥰

B. 如果想加入雞蛋的，在飯煲好後加入雞蛋，和蕃茄一齊攪爛就可以。電飯煲的熱力會將雞蛋整熟。攪爛後，飯就會變成蕃茄蛋花飯。😂

C. 如果想做我地呢啲大餸子民版的，步驟就多少少：

a. 要一早先預備海味和肉類，參考上面《預備》的部份。

b. 收工返到屋企，乜都唔好做住，首先就醃排骨。😂 醃排骨：豉油一湯匙、糖半茶匙、豆粉半茶匙，鹽一茶匙，胡椒粉少許，如果有，就加入薑絲一湯匙。

c. 排骨醃十五分鐘左右。

d. 排骨醃緊的時候就預備電飯煲啦，洗米，蕃茄啦，參考上面素食版(A) 的 (a) 及 (b)。

e. 然後將醃好的排骨加入。

f. 加入清水，參考上面素食版(A) 的 (c) 至 (e)。

g. 完成。🥰