親親大自然: 西灣六小時 (2012年10月20日)之完結篇

上回講到我地去完鹹田灣, 坐完沙灘食飽飽又出發喇! \^0^/

跟住, 我同主人就開始我地下午最漫長的路程喇. 我地行咗入去呢條無盡頭的路之後... 

成條路都係咁: 左邊有啲樹, 右邊有啲樹... 上吓山, 落下斜咁... 如是者, 喺個森林度成大半個鐘都係咁. 唔, 咁講啦, 如果你地對植物好有興趣又好喜歡研究的, 一定會好鍾意... 

不過我地就... ... -_____-""  

行咗一大輪, 終於都見到有啲唔同的嘢出現喇!

無錯! 就係一個路牌!!

都好, 
起碼我地知道我地冇行錯路! 仲有2個鐘就到北潭凹!!

係呀! 兩個鐘呀!!! >____<!!

行返轉頭仲大獲, 因為唔止兩個鐘!!

好彩, 冇幾耐之後, 就見到好多好特別的風景同狀況喇! 

諗返轉頭, 係有啲驚, 不過係好值得的! ^^

繼續行的話, 首先, 你地會入到大浪村.

呢度都有啲村民喺度, 終於都有人, 咁都冇咁驚. 行下行下, 喺接近大灣處... 

就會見到有一家食農村菜的村屋

我地經過的時候, 有一個伯伯走出嚟招呼我地試下佢的茶粿同涼茶呀. 

咁耐冇見過人, 又見到前面又係森林, 本來都好想試下佢的美食的.

可惜當主人提醒女人仔半年前在離島趕返出來急症室的事件...

嗰一條迂迴的公路...

嗰一個小心謹慎的司機...

我嗰一個 易碎的玻璃肚...

算把啦....

咁我地就唯有同伯伯答應了兩句就起程喇. 

入咗森林, 又係 左邊有啲樹, 右邊有啲樹... 上吓山, 落下斜咁... 

咦?

前面有個海!!!

原來, 呢個係一個好廣闊的咸淡水交界處, 我地又見到有個紅樹林喇!

YEAH!!

呢度有啲海風, 好舒服! 

咁我地坐咗喺堤壩上休息咗一陣, 

落去石灘玩左一陣, 

又起程喇! 

我地回到麥理浩徑上, 向前繼續行.

冇幾多步, 我地就正式進入赤徑呢個地方喇!!

見到前面又係一條村莊.

我地一路行, 一路聽到愈來愈大聲的 "流聲機" (!!!) 一時播放的是六七十年代的 "粵語流行曲", 一時播放"西方的女高音"的歌聲 (!!!) 

... 將近行到埋啲屋仔度的時候, 啲歌聲真係好大聲. 我就問主人, 

"哇, 我地喺度都聽到咁大聲, 

咁個人喺屋入面咪開到好好好好好大聲?"

主人話 "係啦, 係啦"

點知, 我地行到埋去的時候.....

啲屋係爛晒架! 入面生晒樹, 冇嘢架! 

更加唔會有人啦!!!!

@.@!!!

得呢間.....

我同主人對望咗一陣, 就同對方講, 

"啲聲係喺呢度傳出嚟的!"

 "一定係!!!"

... 之不過, 

啲聲的方向係另外一面噃!... 

>.<!!!...

可能係爛屋後面呢?

但係, 爛屋後面係個山喇噃.... !! >.....<!!!....  

唔理得咁多喇. 我地咩都聽唔到, 睇唔到. 

突然之間, 見到呢條路仔有幾隻狗仔從水上回來!

雖然話主人喺度我冇咁驚. 但係, 啲歌聲仲係喺後面傳緊過嚟架...

之不過, 又好想睇下點解啲狗會喺水度上嚟, 上咗嚟又唔知走咗去邊... 

我地真係好鬼有好奇心架!

哇! 原來係好大好大隻的水母呀!!!!!

成個海都係!!! @.@!!

我同主人一面驚就一面影相... >.<!!

真係咁大個人都未見過!! 

在網上搜查後, 知道呢種母叫做【水巴布亞硝水母(Mastigias papua)】. 佢地係香港常見的水母之一. 半透明的泳鐘上面佈滿住淡黃色的斑點, 我地見到的係有淡藍有綠色. 根據資料顯示, 體色的變異應該係同體內的共生蟲黃藻有關的. 【巴布亞硝水母】會喺陽光充沛的日子, 喺水面層朝向陽光游動, 等共生蟲黃藻進行光合作用, 製造營養. 

我地冇將水母拿上來玩, 亦冇騷擾海水. 只係望住個海, 睇住佢地游來游去, 我地已經好開心. 同佢地影下相, 拍下VIDEO咁, 已經玩咗好耐喇.

望下個鐘, 已經差唔多四點喇. 我地仲要趕路. 因為要再入森林, 如果要趕及天黑之前返出去西貢, 我地就要走喇. 玩到呢度, 我地已經唔再好驚啲歌聲, 仲覺得佢同個海, 同啲水母好融合, 自成一體. 

我同主人好滿足好開心咁走喇~ \^0^/ 

後話: 我地後尾行錯咗路, 入咗一個真係好森林的森林. 一個行山的人都見唔到. 而天色又開始暗. 其實, 我好驚. 主人嗎? 我唔知呀, 反正問佢都一定話唔驚的. :P
呢個TRIP 雖然好辛苦, 但係, 我地真係好滿足, 玩得好開心. 兩個人好似探險咁, 經歷一個奇景又一個奇景.  有好靚好舒服的, 又有好驚好奇異的. 原來其實, 喺香港, 仲有好多大自然的生態係好靚好稀有的. 不過在途中, 我地見到唔少生物被搬離自己的生活環境, 放在路邊, 應該是被遊人研究完, 或玩弄完, 隨便放在路上而死了的. 真的希望遊人去遊山玩水的時候, 可以多一點的愛心, 多一點的共融感, 多一點的公德心. 不要破壞大自然的環境就好喇.... 

我地由十點鐘在西貢墟出發, 回到西貢墟都已經五點半, 哇!!!!!

出返西貢市, 生積的女人仔餓得要死喇!! 

為咗獎勵我, 主人同我食咗餐好唔健康的下午茶! ^^

其實, 開心, 就係咁簡單! ^.^

上一篇: 親親大自然: 西灣六小時 (2012年10月)之二