Cafe Malacca

今次想介紹的地方, 係喺西環盛貿酒店 (Traders Hotel) 入面的一間星馬菜館, 名字叫做Cafe Malacca.

 

素來, 我發星加坡狂就係朋友都知架喇. 以前每年都會去星洲幾次名為探朋友, 其實就係去食佢地的街頭美食. 呢兩年, 冇時間過去, 就不停咁喺香港試盡本地有的星坡菜. 自從喺蘇豪區的SHIOK 執咗之後, 就未遇到過真係能夠俾到嗰個Menu嗰個味道我的星馬菜館.

 

今次, 舊同事工作拍擋兼好友提議一同去試下呢度, 咁我地今晚就掉低我的主人佢的蝦子餅, 兩個女人仔自己出去牚枱腳喇! ^^

 

----------

 

Cafe Malacca 雖然係喺酒店入面, 但係因為酒店都只不過係香格里拉 (Shangri-la) 集團入面商務系列的 Traders (盛貿) 品牌, 所以佢地的餐廳比較 casual. 裝潢沒有太隆重, 有一啲似大學裡的高級飯堂咁上下. 因為係商務酒店的關係, 我地亦特別覺得有工幹樣子的客人喺度傾嘢, 又有一個人嚟食飯嘅. 環境一啲都唔焗促, 我覺得好舒服! ^^

打開餐牌, 無太多選擇.

 

因為今次諗住嚟試菜, 所以, 我地打算揀啲真係好地道嘅特色嘢嚟試下. 

首先, 就由前菜 "Straits Delights" 點起.  餐牌入面的 "Straits Delights" 有六款, 我地叫咗...

炒蘿蔔糕 (Fried Carrot Cake) - 炒蘿蔔糕係我必食的一道菜. 星加坡的煮法係將蘿蔔糕切成一大粒一大粒. 再拌以芽菜, 蔥, 炒蛋. 再用醬料炒均. 唔可以太杰又唔可以太散, 味道方面好容易會太咸但唔夠味又唔好食. Cafe Malacca 整的喺香港算係比較似樣的喇. 之前試過銅鑼灣的少爺同家族, 食嘅同我喺星加坡食開的味道爭啲. 

羅渣 (ROJAK) - 唔好問我咩叫ROJAK. 因為佢其實應該係冇中文名的. 佢係一款星馬人好鍾意食的蔬菜沙律. 但係, 千祈唔好俾我地香港人心目中的 "沙律" 兩個字誤導. 因為如果你諗住同我地平時食開的沙律比較, 你一定會覺得佢好怪. 所以, 我從來唔會同朋友介紹佢係沙律, 只係叫佢地試咗先.   我喺星加坡街頭食到的Rojak 的材料係油炸鬼, 青瓜, 菠蘿, 芽菜, 可能會有烚蛋. 再加上辣的花生醬混合而成. 又咸又甜的. 味道我包你地未試過. 但係, 如果喺好熱的東南亞食到涼浸浸的Rojak, 其實真係好爽的. 但係, 可惜我喺香港試過的 Rojak 除咗當年嘅SHIOK 之外, 唔係材料唔夠, 就係太咸, 最重要的係佢地的油炸鬼都唔係新鮮的, 由於係隔夜的所以通常都太硬, 影響口感. 而呢度的, 都唔例外.... -__- 

Singapore Otak-Otak - 我喺網上查咗好耐都搵唔到 Otak Otak 的中文名. 可能, 真係因為香港識整的人真係好少, 而餐廳真係冇得叫. 只見到Openrice 有一篇關於 SHIOK 的食評提過呢個叫做 "鬆軟飯" (但其實入面係冇飯或米的嘢架) .... 我地睇下佢個樣先 (<---)! ... 無錯, 同個名一樣咁怪.  Otak-Otak 其實係魚蓉加入一啲調味料, 用塊蕉葉包住嚟燒. 食落入口即蓉的魚蓉, 有少少辣, 幾惹味架.  拆開咗, 就係呢個樣喇 (-->) ~ ^^ 

 

嚟試星馬菜, 點可以唔叫沙嗲呢~ 我地叫咗半打沙嗲. 分別係雞肉同牛肉! 燒的肉肉汁豐富, 點的醬咸甜適中, 再加上一小方塊一小方塊的椰汁飯! 哇! 超贊!! 

其實, 佢地的份量都唔少. 兩個女人仔, 可以食到以上四個菜, 都好大食下... :p

又其實, 食到呢一度, 我地又已經飽飽地... :p

之但係, 呢啲都只不過係前菜咋噃... 我地冇理由唔試埋佢的 Main Dish 架...? :D

 

佢地的Menu 入面, 除咗上面的 "Straits Delights" 之外, 仲有 "Noodles" (麵類), "Rice" (飯類) 同 "Veggies" (素菜類). 我地就叫咗一個飯:
 

Nasi Lemak - 我都唔知佢個中文名係咩呀. 之不過, 佢同 Rojak 及 Otak-Otak 唔同. 你可以喺好多地方都可以食到 Nasi Lemak. 因為佢係一個好普通食星馬印菜的地方都有賣的飯. 就好似圖中見到的一樣, Nasi Lemak 有飯, 有炸雞, 有蛋. 不過你地見唔到的係... 佢的飯有好香的椰汁味. 口感絕對唔係我地平時食到的泰國或大陸或日本米. 好鬆化好香的. 你地亦見唔到的係, 兩件好炸的雞, 真係超超超超超好味!! 唔好睇佢好似好燶咁. 其實佢一啲都唔燶, 深色只係佢的醃料令佢變深色. 佢的脆口惹味同鬆化, 令到我地兩個口中不停叫好飽的人, 都停唔到口!! 呢個, 可能係我食過整得最好的Nasi Lemak!!

食完主菜, 無錯, 我地係意猶未盡架.

我地為咗令個胃可以休息一下, 我地坐咗一陣, 傾咗一陣, 之後, 就嚟個最後反擊!!!

呢個甜品, 叫做 Kuih Dadar. 網上搜尋到見有人叫佢做 "香蘭椰絲卷".
睇見佢個顏色, 
都知道佢同 Pandan Leaf 斑蘭葉一定係親戚!

佢係用斑蘭葉造的麵粉皮包住入面用椰糖煮過的椰絲. 斑蘭葉的香味淡淡的, 夾在少少甜充滿椰香的椰絲一起食, 哇! 

呢個真係今晚呢餐飯最圓滿的結束!