鮮味滿足: 北海道活蟹宴 ＫＡＮＩＺＥＮ 蟹膳
好喇好喇! 主人終於都病好喇!
因為佢已經成功將感冒傳染咗俾我喇! 
今日成日留喺屋企休息，又寫下ＢＬＯＧ 啦。
今日想寫的係開張兩年幾，鍾意食日本嘢的人應該都已經聽過，嗜蟹的人更加應該已經試過，好出名，位於灣仔的＂ＫＡＮＩＺＥＮ 蟹膳＂喇 !
ＫＡＮＩＺＥＮ 蟹膳 的老闆， 就係 ＫＡＴＴＥ ＳＨＡＢＵＳＨＡＢＵ 勝手 的老闆 ＫＥＮＮＹ 同 ＫＥＶＩＮ 喇。＂勝手＂喺銅鑼灣大坑一帶的成功，令到佢地萌生將活蟹料理帶嚟香港的念頭。記得2010年頭，同朋友去＂勝手＂食ＳＨＡＢＵＳＨＡＢＵ，遇著當時的另一個老闆 ＴＩＭＯＴＨＹ，聽佢同我的朋友分享佢地幾個搞＂蟹膳＂的想法同構思。。。當年我剛剛又在日本＂蟹道樂＂完。。。
哇! 當時真係好期待佢地快啲開架~~ 
２０１０年７月，佢地開張之後，都有同朋友去試過佢地的 ＬＵＮＣＨ ＳＥＴ。嗰次的經驗已經好好架喇。雖然係 ＬＵＮＣＨ，但係水準一啲都唔馬虎，一啲都唔粗製濫造。食完仲好想快啲能夠試到佢地的 ＤＩＮＮＥＲ。不過始終，佢地價錢都屬於中上，唔係咁多朋友肯隨便去試。咁今次係同主人兩個月一度的＂食豪啲＂慶典，見主人又咁鍾意食蟹，於是乎，我地就決定去食晚餐！\^0^/
----------
ＫＡＮＩＺＥＮ 蟹膳 係一間走全日本路線的蟹宴專門店，佢地提供的係北海道活蟹料理。即係話，我地食到的唔會係冰鮮蟹，又唔會係雪蟹。而係好似我地去海鮮店揀海鮮一樣，喺個缸度活生生捉上來的蟹~
唔信點活蟹法？拿！一入門口就見架喇 !
經過玄關的大門之後，就會見到 ＫＡＴＴＥ ＳＨＡＢＵＳＨＡＢＵ 勝手 標誌式的一人一鍋ＳＨＡＢＵＳＨＡＢＵ 枱 （圖左）。如果想密密傾下計的，佢地仲有私隱度高一點的ＣＯＵＣＨ ＴＡＢＬＥ，可以坐二至四人 （圖右）。(圖片來源：ＫＡＮＩＺＥＮ 蟹膳)
而餐廳樓上還有一些適合較大 ＰＡＲＴＹ 的六至八人 ＶＩＰ 房，私隱度更高。
----------
佢地晚餐主要係賣 ＳＥＴ ＭＥＮＵ 的，有分二人前，四人前及六人前。意思是，份量建議要二人以上，四人以上，或六人以上才會食得晒。當然，特別大食的就另計。。。
我同主人兩個人，就叫咗個＂鱈場蟹毛蟹套餐＂，係屬於二人前份量的。
下面介紹的係套餐的＂海膽茶碗蛋＂
茶碗蛋就食得多。有蟹肉喺入面的就好少地方有得食。
而再有幾片原片海膽喺上面的就更加少有。
好豪華的一片一片又濃又甜的海膽，
配上蛋中的一片片新鮮雪場蟹肉，
極其鮮甜！
好味！ 
跟住落嚟就係＂燒鱈場蟹蟹腳＂
記得上次在鰭処光食燒蟹腳時的啖啖肉，今次呢隻蟹腳相對就細一啲。而我就一貫的唔識拆蟹肉，又要勞架主人幫我。
不過因為都係新鮮蟹的關係，蟹肉係好實在好有質感好鮮甜的，燒的再加上一點點的烤香的味道。
好味！
＂海膽流心蛋黃天婦羅 拼 鱈場蟹肉＂
又係我地的至愛海膽！
又係我地的至愛流心蛋黃！
我係我地的至愛鱈場蟹肉！
今次真係俘虜咗我地的味覺喇！！
唔好多講，淨係想像下個蛋黃ＴＥＭＰＵＲＡ 內流質的蛋黃，配一口肉質結實又鮮甜的蟹肉，再一口新鮮的海膽，又配一口肉質結實又鮮甜的蟹肉！食完，個口仲有一口一口的香味，感覺超幸福！
超好味！
登登登登！！！
重頭戲嚟喇！！！
跟住落嚟就係我同主人都好鍾情的＂鱈場蟹鍋＂喇。首先，等我地嚟睇下有啲咩材料先：
(一) 原隻毛蟹
(二) 大量野菜
（三） 而重點，就係呢個昆布湯底的紙火鍋： 我地首先會以呢個湯底，好似平時食SHABUSHABU 咁將啲材料灼熟來食。因為野菜同毛蟹都好新鮮，只係用昆布湯底灼熟佢，食物的原汁原味，鮮甜口感都會出晒嚟。
而灼的過程之中，毛蟹同野菜的鮮味同甜味又會落入晒個湯底度。而呢個湯底，就係一陣間用來煮個毛蟹粥的湯底喇。
ＳＨＡＢＵＳＨＡＢＵ 的材料食完之後，服務員就會把預先準備好的米及蛋，放入湯中，慢慢加熱。一面煮我地見到個湯慢慢變稠。到差唔多稠度的時候，服務員會好貼心的詢問客人喜歡濃一點的還是稀一點的粥品，再因應客人的要求去計算煮的時間。。。
一個好鮮甜的"毛蟹粥"就係咁，喺我地面前完成咗喇。
好味！好味！好好味！
後話：
食呢個蟹粥的時間係舊年的12月頭喇。今次再睇番寫番，雖然病緊，但係胃酸都不停在流。講真，晚餐的價錢真係唔係我地一般人平日隨隨便便話去就去的價錢。硬係要找些藉口去慶祝呀，什麼什麼大典呀，咁就去得冇咁內疚。不過，平時，間中去食個 LUNCH 我覺得都可以的。 畢竟，佢地無論勝手同蟹膳的LUNCH SET 我都覺得保持到質素之時又好抵食的~
留言
張貼留言