羊毛氈@思思奈美

呢幾日病到溫溫登登，工又返唔到，街又出唔到，連胃口都冇。食咗啲葯日日喺屋企wing wing 下，瞓到咁上下，百無聊賴。記得上星期陪主人去睇醫生，經過書局，包咗盒羊毛氈公仔工具。好啦! 就攞出嚟消磨下時間同精神啦~

網絡圖片

點解我會買呢盒公仔呢？你地睇到個盒面都應該估到喇！係呀，佢兩個好似我家的 "聰思林林"呀！其實買的時候都顫顫惊惊架，因為女人仔手工藝自出娘胎就已經係九流，讀女校要學家政就年年僅僅合格。不過，為咗聰思林林，我係會努力架！

盒入面有呢啲材料：

Photo by @Little Woman Blog

仲有說明書，都講得好清楚。圖文並茂，如果唔鍾意睇字的就啱晒！

跟住佢的指引，其實一啲都唔難。至緊要係有耐性，係咁吉係咁吉。唯一要提醒大家的係，要小心吉親手指呀！女人仔因為初初玩，冇好似人地咁預備指套，所以整整下，發現自己的手指公好多個窿窿。。。

話咁快就整好個頭仔喇~

似唔似呢？

我一路整，就一路對住思思奈美。

整到咁上下，佢行開咗，我又要叫佢返嚟。

望下佢個樣，又整下個公仔個樣。。。

 整完個頭，就整個身喇。其實唔好睇個頭好似好複雜咁，只要跟住步驟，慢慢吉呀吉呀咁，都好容易。反而，我就覺得整個身難啲。因為個身相對大好多呀，所以要吉得更耐。因為如果吉得唔夠實，啲毛毛好快就會鬆返晒架喇，咁再吉啲腳腳落去的時候就會變形架喇～

好喇～　大功告成～　

 

跟住就係將個頭同個身吉埋一齊。

吉完之後，同 "思思奈美" 拍埋一齊睇。。。

第一次整，算係咁啦~

我見網上啲人POST 的好靚，我會加油努力的 ! 因為。。。

我愛上咗玩羊毛氈公仔呀～～

好喇！下一隻就係＂阿部聰＂喇～