星加坡白胡椒蝦 簡單做法

好耐冇寫食譜喇。今日就寫一個女人仔好鐘意食的 “星加坡白胡椒蝦”，其係做法好簡單架😀。

以前喺星加坡嘅超級市場通常都只會見到 “黑胡椒蝦／蟹” 的調味料，搵咗好多年都冇見過有白胡椒 xxx 。之前都有問過星加坡的朋友，原來喺佢地的心目中，原來 “白胡椒xxx” 實在太容易整，所以就冇敷會出呢個調味包喎 😅😅😅。。。

嚟咗英國，新鮮海鮮冇咁容易買到，而且我唔可以處理活口的，所以我都會好似以前住荒島咁，買急凍食材返屋企嚟。不如快快趣趣俾大家睇下個食譜先啦：

材料：

1、急凍蝦八隻

2、白胡椒粒 1 tbsp

3、蒜頭 2-3 cloves

4、牛油 10-15g

5、黑胡椒碎 少許

6、紹興酒 1 tsp

7、生粉 少許

8、鹽 少許

*可以加粉絲或豆卜墊底更好味呀😋

做法：

1、洗蝦、抹乾、用鹽及生粉醃、撞水幾次沖乾淨（呢個撞水的部驟係好重要的，可以令急凍蝦有彈牙的感覺），挑腸，吸乾水份備用

2、白胡椒用 grinder 顏碎直至出香味
3、準備蒜蓉、牛油
4、白鑊爆香白胡椒，再落蒜蓉和牛油
5、將醃好及乾身的蝦，放鑊中煎至七八成熟、反轉煎另一面
6、加入少許紹興酒及黑胡椒碎略兜均之後蓋上鑊蓋焗三分鐘
7、蝦熟之後落生粉芡兜均之後可上碟

－－－－－

其實嚟咗英國一年有多了，而家除咗煮中式（包括東南亞）食物之外，亦都有間中整下日式飯團做 lunch，或者韓式泡菜鍋，亦開始習憤食多咗食西餐。一個星期入面，我地而家都會有一半係食西式架，好似沙律，三文治、熱狗、All Day Breakfast、PIZZA、青口呀，慢煮雞胸呀咁，比起初初落地時食嘅嘢已經多完化咗好多。

而家其實間中都會整 d 新的菜式，不過就懶冇寫咁多上嚟，整完食完就算。其實每次整新嘢，都要上網睇好幾個食譜，先可以習各家之大乘，鑽研到自己想食的味道出嚟。所以真係要勤力 d，因為已經試過好多次，就係想再整的時候，唔記得咗點整，邊個 youtuber 邊 d 啱用邊 d 唔啱用，邊 d 太複雜，又要由頭再諗過 😅😅。。。所以，真係要勤力 d，做完就即刻記低，執相，出 post，咁大家又可以多 d 簡單食譜可以 follow，我下次又可以記得點整喇～