－轉眼已經 2026 年了！

原來已經有成兩年冇 update 過個 blog 喇。

呢兩年喺英國忙於生活忙於返工，今年2026年終於可以停下來，靜下來，重新回顧一下過去呢三年幾嘅生活，同埋做好耐冇做過嘅展望。

2026年呢一刻我已經辭咗工，又再退休了。今次嘅退休，就係為咗醫我呢一對喺香港每年都等緊適當時候佢做手術嘅眼睛。舊年年嘅年尾，我正式離開職場，三個月之內就已經做咗兩隻眼嘅白內障手術，仲做埋視網膜修補添。呢一個過程，俾咗個藉口我向公司申請離職。因為身體健康康健原因而需要離開，俾咗我一個機會可以好好的和同事、老闆們歡歡樂樂咁互相珍惜咁分手。而且喺轉介到眼科醫院嘅過程之中，亦都喺不同嘅時候，亦都好好彩遇到好多好好嘅眼科醫生。好多人話英國冇醫生睇，可能對於我哋呢喺香港都唔會因為頭暈身㷫而睇醫生嘅人嚟講，並冇呢一個問題。對於我嚟講，有需要嘅時候呢度嘅專科醫院好專業，亦都可以好快速咁安排到適當嘅治療。呢樣嘢我已經感覺到好感恩亦都好足夠。

而過去呢三年，初嚟報到嘅時候，都忙於適應新生活。由落地，買樓，搵工，轉介專科，我嘅生活都尚算順利，冇乜嘢係我預料之外而又適應唔到嘅。三年嚟，學咗好多生活嘅常識。例如，以前從來都唔會種花，而家連花園都識自己搞。以前植物比我掂過之後都會死，而家竟然會好積極咁樣差不多每日都會出花園照顧植物。無論天氣有幾凍，幾熱都出去幫啲植物保暖、保濕、防曬。生活方式真係唔同晒，感覺生活好充實，亦都覺得自己好有用。

嚟咗三年幾啦，生活都習慣晒。早兩年嘅新年，每年都喺度諗緊點樣可以 meet 到公司嘅 KPI, 而今年因為正式開始從工作之中退下來，就可以諗吓自己日常有啲乜嘢可以增值一下，或者為社會服務。

朋友又會問我，你唔做嘢喺屋企咪好悶囉。其實，就算以前唔喺英國嘅時候，我有一段時間都冇做嘢，都從來冇悶過，亦都從來冇懶惰過。就算無返工，其實我都會令到自己每一日嘅生活都好忙，編好好多工作比自己，所以呢樣嘢從來喺我人生之中都唔係一個問題。而由我舊年八月尾 Last Day 之後，到而家一月，呢四個月，其實我都真係好忙，哈哈。

所以，2026 年我對自己嘅期望係，希望生活忙得來可以有啲意思。以下係我俾自己2026年嘅承諾，寫落嚟嘅原因係希望自己唔好忘記，同埋可以俾自己睇返 remind 返自己，到咗年尾或者下年年頭嘅時候可以睇返自己做到幾多：

一、完成「西藏生死書」（The book of living and dying) 呢本書，延續我在藏密嘅修行。

二、完成 The Law of One  呢本書，讓我可以更了解世界和宇宙。

三、繼續 Crochet 俾 charity，今年由十月開始我做咗好多project，包括為 Royal British Legion 籌款嘅 poppy appeal，捐俾老人院嘅 lap blanket，為 Dementia UK 腦退化服務 及 Anthony Nolan 血癌病患者幹細胞服務 籌款嘅 knitting challenge，為失去年幼嬰兒服務嘅 Our Angel Bears 機構 crochet 白色心心，為社區年青人捐贈聖誕禮物 Santa Worry Worms，捐贈俾老退化病患者嘅聖誕禮物 Trauma Bears。今年我希望可以繼續做嘅有：俾老人院嘅 Lap Blanket，俾有需要機構嘅 Trauma Bears，仲有 Headband, Beanie，同埋一啲 urgent appeals，希望喺我有能力嘅時候，可以繼續為社區做多少少貢獻。

四、我唔知點樣可以令到我嘅經濟有增長，而家呢個世界經濟情況之下，應否做投資，或者點樣保本，我都唔係好清楚。但係我希望我自己喺 2026年，喺呢一方面可以增值少少，為自己同埋為屋企嘅將來準備一下。其實我哋都冇話好積極咁節約，有需要嘅仍然都會出街食飯，旅行亦都會照去。所以，嚟緊呢一年可能要考慮吓增加自己收入，呢方面我覺得應該有改善嘅空間。

五、過去呢幾個月，我擺咗好多時間落去 Crocheting，我都唔知點樣可以抽時間繼續畫畫。其實放低咗差唔多有三年啦，我希望今年可以搵返一個平衡，撥返一啲時間出嚟畫畫。

六、身體健康仍然係重中之重。注意飲食，多菜少肉，多做運動仍然都係我嘅重點。2025年年尾嘅時候，朋友嘅介紹之下 join 左 leisure centre 嘅 Black Friday 優惠，買咗一年嘅 gym pass，今年可以無限制咁樣去gym。而家已經習慣咗一個星期有兩至三日去 gym 上堂，希望喺身體情況容許之下，能夠keep到。

七、旅行：今年年中我哋會返亞洲一轉，秋天就考慮緊同朋友一齊去郵輪玩，其他小嘅行程，好似我哋過去呢兩年每個月會去一個英國嘅小鎮呢啲都未有計劃。但係睇返頭先一至六項，都見到我其實已經好忙，而且啱啱12月尾先至喺西班牙返嚟。所以暫時可能都會休息一陣先再諗。

而家喺英國嘅生活好滿足，好充實，亦都好開心。希望呢一種正能量可以繼續keep住落去，希望我可以保持住呢一個節奏，有機會會再喺度update，希望可以俾自己一啲推動力。