親親大自然: 西灣六小時 (2012年10月)之一

作者：
主人又帶我行山喇！

有過上次龍脊的經驗，主人好睇得起我。今次挑戰難度三粒星的麥理浩徑第二段的西灣赤徑一段。預計行程比上次長一倍，總共係五個小時！@___@!!

Photo@Little Woman Blog

好細個的時候，間中會跟阿爸行山。大浪灣喺我的記憶裡面就係。。。好鬼好鬼靚同埋。。。好叉叉叉叉叉叉叉辛苦！所以，今次雖然承蒙主人睇重，但其實，女人仔實在係十分戰戰兢兢架。。。 >___<!

當日計劃的行程係
西灣亭-->西灣-->鹹田灣-->赤徑-->黃石碼頭
 ----------


我地上晝九點鐘已經去到西貢墟，搭乘往西灣亭的村巴。車程約二十至三十分鐘。大約九點半左右，我地就已經去到我地的起點：
西灣亭！


PART I　－　西灣亭-->西灣


 呢段路唔長，沿路風景亦唔錯。大致上係平路同石屎路嚟嘅。中途會經過萬宜水庫，有高山水塘開揚景，一望空闊，心廣神怡。而唯一的上山路，就係上吹筒坳的一段喇。
 






上到去到吹風坳，我地就見到有條分叉路。指示牌叫我地落山，向西灣進發!!! ^-^
落山的路都唔難行。

好快就落完，見到前面有一條平路。。。


 咦？
有景噃！

咦？
原來前面有個紅樹林呀！
\^0^/

女人仔我好鍾意紅樹林架！見到呢個喺世外桃園入面的紅樹林，我當然唔肯走啦。就咁，就伏咗喺啲欄杆度係咁喺度搵搵搵。。。

搵咩？梗係彈塗魚啦, 寄居蟹啦, 白鷺啦...

原來，西灣位處季節性河道的出海口。所以，喺鹹淡水交界的地方，就孕肯咗呢一大片紅樹林喇。
主人再三催促，話前面仲靚呀！行快啲啦！。。。女人仔先至依依不捨咁影咗張全景相，同紅樹林講拜拜喏。。。





離開紅樹林冇耐，我地就入到 西灣村喇。換言之，距離我地第一個目的地，已經好近喇。



入到西灣村，原來呢度有幾間士多架噃。除咗有嘢食飲品補給之外，士多原來仲有提供租房，廁所同淋浴的設備的。如果嚟呢度的沙灘玩，都幾方便噃。

一路行，一路望出去，就已經係遠近馳名，水清沙幼，貴為「香港十大自然勝景選舉」中第一名的西灣，大浪西灣喇！ \^0^/



西灣貴為大浪四灘之首（另外三個海灘由南至北為鹹田灣、大灣及東灣），除咗著名水清沙幼之外，對出海面的大洲同尖洲兩個小島，原來就係西灣的代表性海景。而佢未受污染的原始海灘，海灘對出海域內的龐大珊瑚礁，連同大浪四灘的海景，更加享有
「香港大堡礁」的稱號架。好巴閉呀！\^0^/!!!


我地用咗大約四十五分鐘的時間，由西灣亭行到嚟呢度。行程唔算長，亦唔辛苦。呢度真係好似去咗世外桃源咁，由我細細個到而家，都冇乜點變過。呢度好少人，好乾淨。仲有好多小生物係我地平時就算去沙灘都唔會見到的。

我同主人喺度玩咗好耐呀。我諗都有成半個鐘。就係咁。。。

 。。。望住啲海星呀。。。



蟹仔呀。。。

 。。。水母呀。。。

。。。好似返返去細路仔的時候咁。

我地冇乜講嘢，只係見到新生物時叫對方嚟睇。但係，我地兩個都樂在其中，好開心，好舒暢。

可惜，因為我地仲有漫漫長路要行。所以，玩咗半個鐘左右，我同主人都要同呢度的海洋生物講拜拜喇。

我地走向沙灘的另一邊，望住呢條石梯，不其然令我想起電視台剛剛在播的＂天梯＂。。。


個山好高呀~~~ >__<!

。。。爬上去，就開始去我地下一個的目的地
鹹田灣

（待續。。。）
資料搜集:

留言

張貼留言