《南乳齋煲》其實好易整：點解外面餐廳的《南乳齋煲》冇南乳味？

女人仔 好鐘意食《南乳齋》，但係好多時候喺香港的茶餐廳或酒樓食到的《南乳齋》好睇師傅心情，有七八成的食肆做出來的都會變成《羅漢齋》，完全冇南乳味。所以，我以前喺香港都係自己煮多。

香港煮就比較容易，至少南乳都容易買到，而且中式菜的種類，豆品的選擇都多。

喺曼城，香港人愈來愈多，中式的材料就愈來愈齊全，已經冇咗話以前去到外國一定只食漢堡包薯仔呢回事。而且而家上網買，送到屋企，更加分分鐘平過搭車出去中式超市買。

今次呢個食譜，就寫咗一啲坊間冇人寫過的重點，點解有時食到的南乳齋都變成《羅漢齋》，點樣可以有多啲《 南乳》味呀。

《南乳齋》的其他材料我自己就會視乎自己的喜好，買到的材料去預備。同出面食肆的可能有出入，不過無論如何都一定係素食。

我的材料：

• 冬菇 5 隻
• 雲耳 10 隻
• 泰國粉絲 1 小札
• 紹菜 半個
• 甘荀 2 條
• 豆卜 5 個
• 麵筋 5-6 個 （自製）
• 豆皮片 適量
• 芽菜 適量
• 髮菜 適量
• 薑 3 片

調味料需要：

• 鹽
• 麻油
• 粟粉
• 生抽
• 紹酒
• 胡椒粉
• 南乳 4 小磚

預備（一）（5分鐘）：

1. 先把冬菇，雲耳，泰國粉絲，分別用水浸至軟身。
2. 芽菜浸水。
3. 薑片切好。

待冬菇浸軟後，預備（二）（20分鐘）：

1. 浸冬菇的水留起備用。冬菇去蒂，以粟粉洗淨，加少許鹽及麻油醃二十分鐘左右。
2. 雲耳浸開後切去底部硬塊，洗淨，瀝乾水份，備用。
3. 泰國粉絲浸軟後剪開，瀝乾水份，備用。
4. 芽菜洗淨，瀝乾水份，備用。
5. 紹菜、甘荀、洗淨切好，瀝乾水份，備用。
6. 豆卜、麵筋剪開，和豆皮片一起用滾水汆水 2-3 分鐘，撈起，瀝乾水份，備用。
7. 髮菜浸開。

煮法（30分鐘）：

1. 燒熱 2 湯匙油，把薑片略爆，下南乳兩磚爆香，用中慢火炒香。
2. 加入冬菇、雲耳及甘荀，倒入之前留用的水（注意份量＊），蓋上蓋用中小火炆約 10 分鐘，其間不時攪拌。
3. 加入紹菜，轉大火，加蓋煮至軟身。
4. 加入豆卜、麵筋、豆皮片和髮菜，蓋上蓋用中小火再炆 10 分鐘。
5. 最後加入粉絲及芽菜。
6. 👉👉👉💕再加入兩磚南乳，紹酒及麻油拌勻，蓋上蓋用中小火再燜約 3 分鐘便可。💕

注意：

• 上面煮法的第六點就係徵結所在喇。除咗一開始要爆香南乳之外，正如我地煮餸有時要埋茨一樣，當加入咗好多材料之後，之前爆開的南乳都已經被水份溝淡咗，最後再加返南乳去收返個汁，補充返南乳的味道。所以最後再加兩磚南乳、落紹酒及麻油，食的時候先至會有濃濃的南乳味。
• 有些朋友喜歡南乳汁杰身啲的，可以再埋一個生粉茨。但我自已就覺得如果煮的時候控制好水份，就唔使再加粉就會健康啲。呢個係個人的選擇，都冇乜所謂。
• 總之記住，疏菜會出好多水，在開頭的時候唔好加入太多水去煮菇，略略蓋過唔好痴底就可以了。
• 如果喜歡加入花生、金針、之類的朋友，可隨意加入，做法都是大同小異。只是因為我唔食所以冇加。如果想加花生同金針，可能要先浸一浸，早啲開始同冬菇一齊炆耐啲。其他材料就自己決定啦～
• 順帶一提，以上的材料都可以喺曼城買到，而麵筋我就係自己整的，做法會在下一篇介紹。