女人仔的小確幸

其實對於英國的食材，我地都已經習慣咗。同以前喺香港一樣，我地除咗會出街食日本嘢、海鮮等的餐廳之外，都甚少出街食飯，因為自己煮點都啱自己口味啲。當然，除咗媽咪煮的餸，係永遠都最好味架，食極都唔會厭架啦～😍 所以，我地嚟咗英國之後都 唔係 特別掛住香港的嘢食。初時，因為忙搞落地的事情，唔識得搵地方買材料。而家都已經摸熟晒，更加欣賞呢度的材料種類之多，亦都好多選擇。以前好多即食的嘢，而家雖然未必買到，但係俾我地知道，原來整都好容易，更加俾我地知道自已放緊啲乜嘢入口，安唔安全，健唔健康。 因為我以前有一段時間係食素的，所以我係好鐘意食麵筋。但係，大家都知道，我地住喺🌴荒島嗰七年，其實同而家冇乜分別，就係有啲食材係可遇而不可求的，買到係好彩，買唔到係正常。😂 嚟到英國，就見到有網友廚神，教大家整麵筋，而材料就只係三樣嘢，仲要其中一樣係水。咁簡單，唔係唔試下呀： 材料： 小麥蛋白粉 Vital Wheat Gluten Flour 90g 酵母 Yeast 1.7g 暖水（暖水有助酵母發酵）110g 做法： 將所有材料混合，搓成麵團。麩質會令麵團有彈性，搓的時間會需要比教用力。 在麵團表面塗上食油，讓麵團休息 (REST) 30-45 分鐘。 3. 休息後，麵團會更緊密，剪開約 30-40 粒。 4. 放入氣炸鍋，視乎氣炸鍋容量，分數次氣炸。麵團與麵團之間要留有空間澎漲。 5. 氣炸 200 度約 8分鐘。出來會好似山筋的樣子，一個個的圓波波。 這時放湯也可，剪一刀讓它收縮後冷藏也可。 加入酸甜醬或咖喱汁就可以煮一個酸甜齋或酸甜齋了～

女人仔 好鐘意食《南乳齋》，但係好多時候喺香港的茶餐廳或酒樓食到的《南乳齋》好睇師傅心情，有七八成的食肆做出來的都會變成《羅漢齋》，完全冇南乳味。所以，我以前喺香港都係自己煮多。 香港煮就比較容易，至少南乳都容易買到，而且中式菜的種類，豆品的選擇都多。 喺曼城，香港人愈來愈多，中式的材料就愈來愈齊全，已經冇咗話以前去到外國一定只食漢堡包薯仔呢回事。而且而家上網買，送到屋企，更加分分鐘平過搭車出去中式超市買。 今次呢個食譜，就寫咗一啲坊間冇人寫過的重點，點解有時食到的南乳齋都變成《羅漢齋》，點樣可以有多啲《 南乳》味呀。 《南乳齋》的其他材料我自己就會視乎自己的喜好，買到的材料去預備。同出面食肆的可能有出入，不過無論如何都一定係素食。 我的材料： 冬菇 5 隻 雲耳 10 隻 泰國粉絲 1 小札 紹菜 半個 甘荀 2 條 豆卜 5 個 麵筋 5-6 個 （自製） 豆皮片 適量 芽菜 適量 髮菜 適量 薑 3 片 調味料需要： 鹽 麻油 粟粉 生抽 紹酒 胡椒粉 南乳 4 小磚 預備（一）（5分鐘）： 先把冬菇，雲耳，泰國粉絲，分別用水浸至軟身。 芽菜浸水。 薑片切好。 待冬菇浸軟後，預備（二）（20分鐘）： 浸冬菇的水留起備用。冬菇去蒂，以粟粉洗淨，加少許鹽及麻油醃二十分鐘左右。 雲耳浸開後切去底部硬塊，洗淨，瀝乾水份，備用。 泰國粉絲浸軟後剪開，瀝乾水份，備用。 芽菜洗淨，瀝乾水份，備用。 紹菜、甘荀、洗淨切好，瀝乾水份，備用。 豆卜、麵筋剪開，和豆皮片一起用滾水汆水 2-3 分鐘，撈起，瀝乾水份，備用。 髮菜浸開。 煮法（30分鐘）： 燒熱 2 湯匙油，把薑片略爆，下南乳兩磚爆香，用中慢火炒香。 加入冬菇、雲耳及甘荀，倒入之前留用的水（注意份量＊），蓋上蓋用中小火炆約 10 分鐘，其間不時攪拌。 加入紹菜，轉大火，加蓋煮至軟身。 加入豆卜、麵筋、豆皮片和髮菜，蓋上蓋用中小火再炆 10 分鐘。 最後加入粉絲及芽菜。 👉👉👉💕再加入兩磚南乳，紹酒及麻油拌勻，蓋上蓋用中小火再燜約 3 分鐘便可。💕 注意： 上面煮法的第六點就係徵結所在喇。除咗一開始要爆香南乳之外，正如我地煮餸有時要埋茨一樣，當加入咗好多材料之後，之前爆開的南乳都已經被水份溝淡咗，最後再加返南乳去收返個汁，補充返南乳的味道。所以最後再加兩磚南乳、落紹酒及麻油，食的時候先至會有濃濃的南乳味...