開光喇！(付心心煲之 ｢沙嗲牛肉粉絲烏冬煲｣ 簡易做法）

睇完晒Ｄ清潔教學、短片、說明書，
放咗喺大廳養咗三日，
今日終於都為我的第一個敗家煲開光喇！^__^

為咗唔好有ＢＡＤ　ＭＥＭＯＲＩＥＳ，
我第一個用佢嚟煮的菜係
　｢只許成功！不許失敗｣嘅。。。

但係，我又唔可以用一Ｄ太簡單的菜為它開光架噃。。。
點都要尊重一下佢家麻。。。

左諗右諗，就用一道自己十多年前已經煮到爛到已經不會再煮的。。。 
｢沙嗲牛肉粉絲煲｣ 
來做這個開光儀式啦！



因為仍然仲係趕ＰＲＯＪＥＣＴ階段，冇時間煮第二度菜。
所以今次就簡單Ｄ在粉絲下面加底，加了日本烏冬，
咁。。。就唔使煮飯啦~ ^__^

俾我諗到用呢一個簡單得不能再簡單的菜嚟為佢開光，
 今次仲唔「真係抵你敗家」？
  ^__^

心心煲 之｢沙嗲牛肉粉絲烏冬煲｣ 簡易做法

（需時約三十分鐘）：

材料（二人份）　－　

急凍烏冬一包

粉絲(細)一包浸清水

露荀半包清洗後切段

薄牛片１００克

雞蛋一隻

乾葱、蒜頭、乾辣椒適量切蓉

調味　－　

油少量

鹽少量

沙嗲醬三湯匙

雞湯一盒(細)

中國白酒、麻油少量(用來吊味，不是必要）

做法　－

１。心心煲是白法郎煲，所以記住要凍油凍煲。先把油加進煲中。才開火慢火煮至筷子見泡泡。

２。慢火爆香葱蒜乾椒至有香味。

３。加進露荀略炒、夾起。

４。把沙嗲醬放進仍有葱蒜乾椒之煲內一同爆香至開始杰身。

５。加進雞湯，清水，轉中火，蓋上煲蓋。

６。待醬汁滾起，加烏冬，蓋上煲蓋。

７。再滾起，轉細火，仍然蓋上煲蓋。

８。待烏冬七八成熟，打開煲蓋，加進已浸透粉絲，再一片一片牛肉加進排好。

９。牛肉排好後蓋上數秒，以鑄鐵煲的熱力把粉絲及牛肉略煮。

１０。數秒後熄火，打開煲蓋，放上已爆炒過的露荀，排好，加上生雞蛋。

１１。材料放好後，再蓋上煲蓋數秒以鑄鐵煲的熱力把所有材料熬一下。無需再開火。

１２。當雞蛋的蛋白開始轉白時就可以原煲上枱，如想牛肉或雞蛋再熟一點可以再蓋上煲蓋數秒。記著無需再開火。

註：食譜和照片版權均屬｢幸福小女人｣所有，如欲分享，請列明出處：｢幸福小女人｣。感謝。